नेहा नारखडे ह्या एक अत्यंत यशस्वी आणि प्रेरणादायी भारतीय-अमेरिकन तंत्रज्ञान उद्योजिका आहेत. त्या मूळच्या महाराष्ट्रातील पुणे येथील आहेत आणि त्यांनी जागतिक तंत्रज्ञान क्षेत्रात आपले एक महत्त्वाचे स्थान निर्माण केले आहे.
नेहा नारखेडे यांचा जन्म पुण्यात झाला आणि त्यांचे शिक्षणही तिथेच झाले. त्यांनी पुणे इन्स्टिट्यूट ऑफ कॉम्प्युटर टेक्नॉलॉजी (PICT) मधून अभियांत्रिकीमध्ये पदवी घेतली. त्यानंतर त्यांनी जॉर्जिया टेक (Georgia Tech) मधून कॉम्प्युटर सायन्समध्ये मास्टर्सची पदवी मिळवली. शिक्षण पूर्ण झाल्यावर त्यांनी ओरेकल (Oracle) मध्ये सॉफ्टवेअर अभियंता म्हणून आपल्या करिअरची सुरुवात केली आणि नंतर लिंक्डइनमध्ये काम केले.
नेहा नारखेडे यांनी लिंक्डइनमध्ये सॉफ्टवेअर अभियंता म्हणून काम करत असताना, अपाचे काफ्का या ओपन-सोर्स मेसेजिंग सिस्टमच्या निर्मितीमध्ये महत्त्वाची भूमिका बजावली. काफ्का हे एक अत्यंत लोकप्रिय डेटा स्ट्रीमिंग प्लॅटफॉर्म बनले आहे, जे आज फॉर्च्युन ५०० कंपन्यांपैकी ८०% हून अधिक कंपन्या वापरतात.
२०१४ मध्ये, त्यांनी लिंक्डइनमधील आपल्या सहकाऱ्यांसोबत कॉनफ्लुएंट या कंपनीची सह-स्थापना केली. ही कंपनी संस्थांना मोठ्या प्रमाणात डेटा रिअल-टाइममध्ये हाताळण्यासाठी मदत करते. सध्या कॉनफ्लुएंट कंपनीचा वार्षिक टर्नओव्हर सुमारे $७५० मिलियन (₹६२०० कोटींहून अधिक) आहे. आणि सर्वात महत्त्वाचं म्हणजे, कंपनीचं एकूण बाजारमूल्य (valuation) सुमारे $९ अब्ज म्हणजेच ₹७५,००० कोटींहून अधिक आहे. ही कंपनी NASDAQ वर सूचीबद्ध असून, नेहा नारखेडे आजही तिच्या संचालक मंडळावर सक्रिय आहेत.
२०२१ मध्ये, नेहा नारखेडे यांनी ऑसिलर या रिस्क डिटेक्शन प्लॅटफॉर्मची स्थापना केली आणि त्या सध्या तिच्या सीईओ आहेत. ही कंपनी आर्टिफिशिअल इंटेलिजन्स (AI) वापरून ऑनलाइन व्यवहारांमधील फसवणूक (fraud) आणि जोखीम कमी करण्यास मदत करते. ऑसिलर अजूनही स्टार्टअप स्टेजमध्ये असून, भविष्यात त्याचंही बाजारमूल्य कोट्यवधी डॉलरपर्यंत पोहोचू शकतं.
फोर्ब्सने त्यांना 'अमेरिकेतील सर्वाधिक श्रीमंत सेल्फ-मेड महिलां' (America's Top Self-Made Women) आणि 'तंत्रज्ञान क्षेत्रातील ५० आघाडीच्या महिलां' (World's Top 50 Women in Tech) च्या यादीत स्थान दिले आहे.
नेहा नारखेडे या अनेक नवोदित उद्योजकांसाठी आणि विशेषतः तंत्रज्ञान क्षेत्रात करिअर करू इच्छिणाऱ्या महिलांसाठी एक प्रेरणास्थान आहेत. त्यांचे वडील नेहमी त्यांना इंदिरा गांधी, किरण बेदी, आणि इंद्रा नूयी यांसारख्या कर्तृत्ववान महिलांबद्दलची पुस्तके वाचायला द्यायचे, ज्यातून त्यांना मोठे काहीतरी करण्याची प्रेरणा मिळाली.
त्यांच्या अथक परिश्रमामुळे, दूरदृष्टीमुळे आणि तंत्रज्ञानातील योगदानामुळे नेहा नारखेडे यांनी जागतिक स्तरावर भारताचे आणि महाराष्ट्राचे नाव उंचावले आहे.
