अमरावती -
संभाजीनगर नाका परिसरात भरधाव वाहनाने दिलेल्या धडकेत तरुणाला प्राण गमवावे लागले. ही घटना नगर नाका येथे सोमवारी रात्री 11 वाजेच्या सुमारास उघडकीस आली. या घटनेमुळे तरुणाच्या कुटुंबावर दुःखाचा डोंगर कोसळला आहे. मुकेश चंद्रभान शिंगाडे असे अपघातात मयत झालेल्या बीएसएनएलच्या कर्मचाऱ्याचे नाव आहे. या प्रकरणी स्थानिकांनी दिलेल्या माहितीनुसार, मुकेश शिंगाडे हे मूळचे अमरावती येथील आहेत. ते बीएसएनएलमध्ये लिपिक म्हणून नोकरी करतात. मुकेश शिंगाडे यांची नुकतीच अमरावती येथून छत्रपती संभाजीनगर येथे बदली झाली होती.शहरात बदली झाल्यामुळे मुकेश हे पत्नी, मुलगा, मुलगी यांच्यासह तारा भवन येथे शासकीय निवासस्थानी कुटुंबासह राहत होते. दरम्यान सोमवारी बीएसएनएलमध्ये कार्यालयीन काम आटवून ते सायंकाळी घरी आले होते. रात्री दहा वाजताच्या सुमारास ते पुन्हा घरातून बाहेर पडले. दुचाकी एम एच 27 बी एस 4433 या दुचाकीने ते वाळुजच्या दिशेने निघाले होते.याच दरम्यान नगर नाका परिसरामध्ये त्यांची दुचाकी जात असताना अज्ञात वाहनाने धडक दिल्याने त्यांना भीषण अपघात झाला. यामध्ये मुकेश हे दूरवर फेकले गेले, यात ते गंभीर जखमी झाले होते. तर त्यांच्या दुचाकीचा अक्षरशः चुराडा झाला होता. या घटनेमध्ये मुकेश यांचा जागीच मृत्यू झाला.
