नांदगाव खंडेश्वर :
तक्रारदाराच्या बाजूने प्रकरणाचा निकाल लावण्यासाठी आणि तडजोड म्हणून लाचेची मागणी करणाऱ्या नांदगाव खंडेश्वर येथील नायब तहसीलदार (वर्ग-२) सुनील सखाराम राठोड यांना २०,००० रुपयांची लाच स्वीकारताना लाचलुचपत प्रतिबंधक विभागाने (ACB) रंगेहात पकडले आहे. ही कारवाई १२ ऑक्टोबर २०२६ रोजी करण्यात आली.
काय आहे नेमके प्रकरण ?
तक्रारदार यांच्या वडिलांचे २६/६/२०२६ रोजी निधन झाले असून, त्यांच्या निधनानंतर मृत वडिलांच्या नावावरील मौजा कोहळा जटेश्वर येथील शेतजमीन आता वारसांच्या नावे (तक्रारदार, त्यांची आई व तीन बहिणी) करण्यासाठी वारस नोंद करणे आवश्यक होते. या वारस नोंदीला लागून असलेल्या शेतातून जाण्यासाठी रस्ता मिळावा म्हणून तक्रारदार यांनी अर्ज केला होता.
या न्यायप्रविष्ठ प्रकरणाची सुनावणी नायब तहसीलदार सुनील राठोड यांच्या न्यायालयात सुरू होती. या प्रकरणाच्या मागील तारखेला (२२/७/२०२६) तक्रारदार काही कारणास्तव हजर राहू शकले नव्हते. त्यानंतर २६/७/२०२६ रोजी तक्रारदार हे शासकीय कार्यालय नांदगाव खंडेश्वर येथे गेले असता, नायब तहसीलदार सुनील राठोड यांनी "तुम्ही गेल्या तारखेला हजर नव्हते, त्यामुळे मी तुमचे मॅटर सेट केले असून तुमच्या बाजूने लवकर निकाल लावण्यासाठी ५०,००० रुपयांची लाच द्यावी लागेल," अशी मागणी केली. तडजोडीअंती ही रक्कम ३०,००० रुपये ठरली. लाच देण्याची इच्छा नसल्याने तक्रारदाराने १३/८/२०२६ रोजी अमरावती लाचलुचपत प्रतिबंधक विभागाकडे रीतसर तक्रार नोंदवली.
लाचेच्या मागणीची पडताळणी
तक्रारीच्या अनुषंगाने एसीबीच्या पथकाने १८/८/२०२६ रोजी सकाळी १०:३२ ते १२:११ या वेळेत पंचांसमक्ष लाचेच्या मागणीची पडताळणी केली. या पडताळणी दरम्यान लोकसेवक सुनील राठोड यांनी तक्रारदाराकडे प्रकरणाचा निकाल लवकर लावण्यासाठी आणि तडजोड म्हणून ३०,००० रुपयांच्या लाचेची मागणी केल्याचे निष्पन्न झाले.
लाचेच्या रकमेसह रंगेहात अटक (सापळा कारवाई)
लाचेची मागणी सिद्ध झाल्यानंतर, १२ ऑक्टोबर २०२६ रोजी दुपारी १२:३५ ते १३:२० या वेळेत तहसील कार्यालय, नांदगाव खंडेश्वर येथे एसीबीने सापळा रचला. ठरलेल्या एकूण रकमेपैकी पहिला हप्ता म्हणून २०,००० रुपयांची लाच स्वीकारताना सुनील राठोड यांना पंचांसमक्ष रंगेहात पकडण्यात आले. लाचेची ही रक्कम त्यांनी आपल्या पांढऱ्या रंगाच्या शर्टच्या डाव्या खिशात ठेवली होती, जी पोलिसांनी जप्त केली आहे.
गुन्हा दाखल करण्याची प्रक्रिया सुरू
याप्रकरणी आरोपी सुनील सखाराम राठोड (वय ५७ वर्षे, नायब तहसीलदार, वर्ग-२) यांच्याविरुद्ध पोलीस स्टेशन नांदगाव खंडेश्वर येथे भ्रष्टाचार प्रतिबंधक अधिनियम १९८८ च्या कलम ७ अन्वये गुन्हा दाखल करण्याची प्रक्रिया सुरू आहे. आरोपीला ताब्यात घेण्यात आले असून पुढील कायदेशीर कारवाई केली जात आहे.
कारवाई करणारे एसीबीचे पथक
ही यशस्वी कारवाई पोलीस अधीक्षक बापु बांगर, अप्पर पोलीस अधीक्षक सुनील लांजेवार आणि पोलीस उपअधीक्षक राजेश राठोड यांच्या मार्गदर्शनाखाली करण्यात आली. सापळा पथकाचे नेतृत्व पोलीस उपअधीक्षक रमेश ताले यांनी केले, तर पोलीस निरीक्षक संजय शिंदे, पोलीस अंमलदार वैभव जायले, राजेश मेटकर आणि चालक सतीश किटुकले यांनी या कारवाईत महत्त्वाची भूमिका बजावली.
एसीबीचे आवाहन
लाचलुचपत प्रतिबंधक विभागाने नागरिकांना आवाहन केले आहे की, कोणत्याही शासकीय कामासाठी लोकसेवकाने लाचेची मागणी केल्यास त्वरित लाचलुचपत प्रतिबंधक विभागाशी (ACB) संपर्क साधावा.
