नांदगाव खंडेश्वर :
शहरात अदाणी टोटल गॅस लिमिटेड (ATGL) कंपनीमार्फत सुरू असलेल्या आणि नव्याने प्रस्तावित असलेल्या PNG गॅस पाईप लाईन प्रकल्पाच्या निष्काळजी कारभाराविरोधात नागरिकांमध्ये तीव्र असंतोष निर्माण झाला आहे. या पार्श्वभूमीवर, नगर पंचायत नांदगाव खंडेश्वरच्या नगरसेविका सौ. प्रांजली राहुल गुल्हाने यांनी अमरावतीचे जिल्हाधिकारी, ATGL कंपनीचे व्यवस्थापक, तहसीलदार आणि मुख्याधिकारी यांना जाहीर निवेदन देऊन नागरिकांच्या प्रमुख मागण्यांकडे लक्ष वेधले आहे. जोपर्यंत या मागण्यांवर ठोस लेखी आश्वासन मिळत नाही, तोपर्यंत नवीन कामाला विरोध राहील, असा इशारा निवेदनातून देण्यात आला आहे.
शहरात अदाणी टोटल गॅस लिमिटेड (ATGL) कंपनीमार्फत सुरू असलेल्या आणि नव्याने प्रस्तावित असलेल्या PNG गॅस पाईप लाईन प्रकल्पाच्या निष्काळजी कारभाराविरोधात नागरिकांमध्ये तीव्र असंतोष निर्माण झाला आहे. या पार्श्वभूमीवर, नगर पंचायत नांदगाव खंडेश्वरच्या नगरसेविका सौ. प्रांजली राहुल गुल्हाने यांनी अमरावतीचे जिल्हाधिकारी, ATGL कंपनीचे व्यवस्थापक, तहसीलदार आणि मुख्याधिकारी यांना जाहीर निवेदन देऊन नागरिकांच्या प्रमुख मागण्यांकडे लक्ष वेधले आहे. जोपर्यंत या मागण्यांवर ठोस लेखी आश्वासन मिळत नाही, तोपर्यंत नवीन कामाला विरोध राहील, असा इशारा निवेदनातून देण्यात आला आहे.
रस्त्यांची झाली चाळण ; 'बँक गॅरंटी' घेण्याची मागणी
निवेदनात नमूद केल्यानुसार, यापूर्वी शहरात झालेल्या गॅस पाईप लाईनच्या अस्ताव्यस्त खोदकामामुळे संपूर्ण शहराची चाळण झाली असून रस्ते पूर्णपणे उद्ध्वस्त झाले आहेत. कंत्राटदार कंपनीने हे रस्ते पूर्ववत करून दिलेले नाहीत. त्यामुळे आता नवीन काम सुरू करण्यापूर्वी, आधी खराब झालेल्या सर्व रस्त्यांची तात्काळ दर्जेदार दुरुस्ती करण्यात यावी. तसेच पुढील कामासाठी संबंधित कंपनीकडून प्रशासनाने ठोस 'बँक गॅरंटी' (Bank Guarantee) घ्यावी, जेणेकरून रस्ते दुरुस्त न केल्यास ती रक्कम जप्त करून रस्ते दुरुस्त करता येतील, अशी आक्रमक मागणी सौ. प्रांजली गुल्हाने यांनी केली आहे.
सुरक्षेची १००% हमी आणि आपत्कालीन यंत्रणा हवी
दाट रहिवासी भागात गॅस पाईप लाईन टाकत असताना सुरक्षेची कोणतीही मानके पाळली जात नसल्याचा आरोप नागरिकांनी केला आहे. भविष्यात एखादी दुर्घटना किंवा गॅस गळती झाल्यास स्थानिक पातळीवर कोणती आपत्कालीन यंत्रणा (Emergency Response System) सज्ज असेल? याची १००% लेखी सुरक्षेची हमी कंपनी आणि प्रशासनाने नागरिकांना जाहीर करावी, अशी मागणी करण्यात आली आहे.
धुळीचे साम्राज्य अन् अपघातांची मालिका
मागील कामाच्या वेळी कित्येक महिने नागरिकांना आणि स्थानिक व्यापाऱ्यांना प्रचंड धुळीचा सामना करावा लागला, ज्यामुळे श्वसनाचे आजार वाढले आहेत. तसेच वाहतुकीची कोंडी होऊन अनेक छोटे-मोठे अपघात झाले आहेत. त्यामुळे आता नवीन कामादरम्यान धुळीवर नियंत्रण ठेवण्यासाठी पाण्याचे फवारे मारणे आणि योग्य वाहतूक डायव्हर्शन प्लॅन (Traffic Management Plan) राबवणे बंधनकारक करावे, अशी मागणी निवेदनात करण्यात आली आहे.
थातुरमातुर कारवाईवर पडदा नको; 'थर्ड पार्टी ऑडिट'ची मागणी
यापूर्वी नगर पंचायत प्रशासनाने केवळ नावापुरता दंड ठोकून कंपनीच्या निष्काळजीपणावर पडदा टाकण्याचा प्रयत्न केल्याचा आरोप गुल्हाने यांनी केला आहे. भविष्यात अशी प्रशासकीय उदासीनता खपवून घेतली जाणार नाही, तसेच प्रत्येक कामाचे त्रयस्थ पक्षाकडून (Third-Party Audit) गुणवत्ता परीक्षण व्हावे, असे निवेदनात स्पष्ट करण्यात आले आहे.
"नांदगाव खंडेश्वर शहराच्या सुरक्षेचा आणि भविष्याचा हा अत्यंत गंभीर प्रश्न आहे. जोपर्यंत जुने रस्ते गुळगुळीत होत नाहीत आणि सुरक्षेबाबत लेखी आश्वासन मिळत नाही, तोपर्यंत नागरिकांचा रोष कायम राहील."
सौ. प्रांजली राहुल गुल्हाने(नगरसेविका, नांदगाव खंडेश्वर)
या निवेदनाच्या प्रती जिल्हाधिकारी अमरावती, तहसीलदार आणि मुख्याधिकारी यांना पुढील आवश्यक कार्यवाहीसाठी पाठवण्यात आल्या असून, प्रशासन यावर काय पावले उचलते याकडे आता संपूर्ण शहराचे लक्ष लागले आहे.
