लातूर जिल्हा बँकेवर धीरज देशमुखांचे वर्चस्व कायम ; ‘सहकार पॅनेल’चा १४ जागांवर दणदणीत विजय !

लातूर जिल्हा बँकेवर धीरज देशमुखांचे वर्चस्व कायम ; ‘सहकार पॅनेल’चा १४ जागांवर दणदणीत विजय !

लातूर -
संपूर्ण राज्याचे लक्ष लागून राहिलेल्या लातूर जिल्हा मध्यवर्ती सहकारी बँकेच्या (KDCC) संचालक मंडळाच्या निवडणुकीत काँग्रेस आमदार धीरज देशमुख यांच्या नेतृत्वाखालील सहकार पॅनेलने एकहाती सत्ता राखली आहे. या अटीतटीच्या निवडणुकीत एकूण १९ जागांपैकी तब्बल १४ जागांवर विजय मिळवत सहकार पॅनेलने बँकेवरील आपले वर्चस्व अबाधित ठेवले आहे. तर विरोधी भाजप आमदार संभाजी पाटील निलंगेकर यांच्या नेतृत्वाखालील 'परिवर्तन पॅनेल'ला केवळ ५ जागांवर समाधान मानावे लागले. 
धीरज देशमुखांची दणदणीत आघाडी
या निवडणुकीत सर्वाधिक चुरस प्रक्रिया उद्योग मतदारसंघात पाहायला मिळाली, जिथे स्वतः धीरज देशमुख रिंगणात होते. त्यांनी विरोधी परिवर्तन पॅनेलचे उमेदवार भरत चामले यांचा पराभव केला. धीरज देशमुख यांना १५ मते मिळाली, तर चामले यांना अवघ्या २ मतांवर समाधान मानावे लागले. या मोठ्या विजयानंतर देशमुख गटाच्या कार्यकर्त्यांनी गुलालाची उधळण करत आणि शिट्ट्या वाजवत जोरदार जल्लोष केला.
दिग्गजांची प्रतिष्ठा आणि काट्याची लढत
या निवडणुकीत जिल्ह्याभरातील बड्या नेत्यांची प्रतिष्ठा पणाला लागली होती. 
  • परिवर्तन पॅनेलचे यश : निलंगा विकास संस्था मतदारसंघातून परिवर्तन पॅनेलचे प्रमुख अरविंद पाटील निलंगेकर (आमदार संभाजी पाटील निलंगेकर यांचे बंधू) विजयी झाले. तसेच भाजप आमदार रमेश कराड यांचे चिरंजीव ऋषिकेश कराड यांनीही परिवर्तन पॅनेलकडून विजय मिळवला. 
  • सहकार पॅनेलचे इतर विजयी उमेदवार: उदगीर सोसायटी मतदारसंघातून सहकार पॅनेलच्या प्रीती चंद्रशेखर भोसले या १० मतांनी विजयी झाल्या. याशिवाय हेमंत जाधव, जयेश माने, संतोष पाटील आणि इतर उमेदवारांनी सहकार पॅनेलचा गड मजबूत राखला. 
जनतेने कामाला कौल दिला : धीरज देशमुख
विजयानंतर माध्यमांशी बोलताना धीरज देशमुख म्हणाले, "हा लातूरच्या जनतेचा आणि सभासदांचा आमच्या चांगल्या कामावर असलेला विश्वास आहे. आम्ही बँकेचा टर्नओव्हर वाढवला असून आगामी काळात शेतकऱ्यांच्या अडचणी सोडवणे आणि शिक्षण कर्जावरील व्याजदर कमी करण्याला आमचे प्राधान्य राहील. विरोधकांना ५ जागा मिळाल्या आहेत, लोकशाहीत विरोधकांचेही स्थान असते, त्यांना सोबत घेऊन आम्ही जिल्ह्याच्या विकासासाठी काम करू". 
या निकालामुळे लातूरच्या सहकार क्षेत्रातील देशमुख कुटुंबीयांची आणि काँग्रेसची पकड पुन्हा एकदा सिद्ध झाली आहे. सत्ता राखण्यात सहकार पॅनेल यशस्वी झाले असले तरी, विरोधी परिवर्तन पॅनेलने ५ जागा जिंकून बँकेच्या कारभारावर अंकुश ठेवण्यासाठी मजबूत विरोधी फळी निर्माण केली आहे